Nga BoldNews.al
Videot dhe fotot e shpërndara pak javë më parë, ku Ambasada Gjermane i dhuroi repartit të forcave speciale RENEA 200 palë këpucë, bënë me të drejtë xhiron e rrjetit. Policia Shqiptare u ndje e turpëruar para homologëve europianë, pasi punonjësit që marrin pjesë në operacione të vështira s’kanë të mbathura. Këpucët që u paraqitën në fotot dhe videot ishin të grisura, të shqyera dhe të vjetra.
Dhe ta mendosh që këta punonjës arrestojnë kriminelët më të rrezikshëm në Shqipëri. Përdoren “mish për top” nga politika apo nga drejtuesit politikë të ministrisë dhe policisë.
Sipas disa dokumenteve që ka siguruar “Bold News”, Policia e Shtetit do të blejë plot 350 palë këpucë për repartin RENEA. Policia ka hapur një tender me dy lote, ku i pari është për disa veshje dhe i dyti për këpucë. Objekti i tenderit është “blerje këpucë atletike për personelin e Repartit Renea”.
Policia do të shpenzojë rreth 10 mijë euro për këto këpucë, të cilat duhet ti kishte blerë shumë kohë më parë. U desh turpërimi publik nga fotot në internet që drejtuesit e policisë të kujtoheshin për këtë repart, të cilin vetëm e përdorin për çdo operacion të vështirë.
