Red Bull njoftoi se shoku i ri i skuadrës së Max Verstappen, duke nisur nga viti 2021, do të jetë Sergio Perez.
Piloti meksikan, i cili me Racing Point këtë vit fitoi për herë të parë një garë në Formula 1, do të ketë mundësinë që vitin e ardhshëm të luftojë për fitore të tjera.
“Jam shumë mirënjohës për mundësinë që më është dhënë. Do të garoj me një makinë fituese, gjë që e kam dashur që kur kam ardhur në F1”, tha Perez.
Meksikani 30-vjeçar ka 10 vite eksperiencë në F1, 191 gara të zhvilluara, 10 podiume dhe 1 fitore.
Perez zëvendëson Alexander Albon, i cili tashmë do të jetë piloti rezervë i Red Bull.
