Kryetari i Partisë Demokratike Lulzim Basha ka zbuluar në një bashkëbisedim me drejtuesin e Portalit Studentor, Gevio Tabaku se bashkëshortja e tij e ka kaluar COVID-19.
Basha i bëri apel të gjithë qytetarëve të kenë kujdes për veten e veçanërisht për prindërit që janë në një moshë më të thyer.
“Unë jam mirë, vajzat janë mirë. Bashkëshortja e ka kaluar. Prindërit janë mirë, çfarë është më e rëndësishmja. Të gjithë ata që na ndjekin të kujdesen për veten dhe prindërit. Të marrin masa sa herë janë në kontakt me ta”, tha Basha.
Basha tha më tej se është në negociata me drejtues të PPE mbi ecurinë e negociatave për sigurimin e vaksinës për Shqipërinë. Basha deklaroi se ditën e sotme ka shkëmbyer një bashkëbisedim me komisionerin për Zgjerim Oliver Varhelyi pikërisht për këtë çështje.
Ai akuzoi kreun e qeverisë Edi Rama se ka shkuar në Nju Jork për të bërë një udhëtim luksi.
“Edhe në këtë situatë duhet të mendojmë se çfarë mund të bëjmë para t’i dalë përpara të keqes. Kjo është arsyeja pse më shumë prej dy javësh, edhe sot shkëmbeva një bisedë me Varhelyi për çështjen e vaksinës. Këtu kryeministri bëri udhëtim luksi në Nju Jork sikur po shkon të marrë domate”.
“PD është pjesë e PPE dhe kjo më jep mundësin të flas me disa nga udhëheqësit e Europës dhe pjesëtar të PE me të cilët fola para dy javësh për të kërkuar të bëjnë gjithçka të ndihmojnë Shqipërinë. Ato vende që kanë bërë një porosi më të madhe se sa i duhet të kemi mundësinë ta sjellim në Shqipëri për personelin shëndetësor dhe shkallë pas shkalle të gjithë personelit mjekësor sipas protokollit të OBSH”, – u shpreh Lulzim Basha.
