Nga Boldnews.al
Fondi Shqiptar i Zhvillimit, i drejtuar nga Dritan Agolli, ka shpallur së fundmi fituesin e tenderit për ndërtimin e parkimit të qytetit të Gjirokastrës, me fond limit një shifër tejet të lartë, rreth 4.2 miliardë lekë të vjetra, pa TVSH.
Fitues është bashkimi i operatorëve “Progeen” dhe “Sina”, të cilët kanë paraqitur ofertën për të kryer shërbimin e kërkuar për një shumë prej 2.9 miliardë lekë të vjetra pa TVSH (rreth 3 milionë euro, me TVSH).
Referuar të dhënave zyrtare, në tenderin për ndërtimin e parkimit të Gjirokastrës kanë marrë pjesë 18 operatorë, nga të cilët 14 janë skualifikuar.
Kompania kryesore që ka fituar tenderin, me vlerë rreth 3 milion euro, pra “Progeen” është krijuar në vitin 2013 nga inxhinjeri Genc Kuçuku.
Ajo ka qenë edhe më herët pjesë e raportimeve mediatike, për shkak të lidhjeve me Vangjel Prelën, bashkëshortin e ish-drejtueses së Krimeve të Rënda, Donika Prela.
Sipas raportimeve të mëhershme, të paktën gjatë vitit 2019, Vangjel Prela, edhe ai inxhinjer, ka qenë një ndër bashkëpunëtorët më të afërt të pronarit të kompanisë dhe qëndronte në krahun e djathtë të Kuçukut në renditjen e fotove të stafit, në një faqe të vjetër të shoqërisë së ndërtimit.
Aktualisht, faqja e kompanisë “Progeen” ka ndryshuar dhe nuk ka asnjë gjurmë të Vangjel Prelës.
Megjithatë, fakti që bashkëshorti i Donika Prelës ka qenë një ndër personazhet kryesore të kësaj kompanie, konfirmohet indirekt edhe në një vendim gjyqësor, ku Vangjel Prela ka paditur ish-punëdhënësit e tij, “Bruci” shpk.
Në vendimin e Gjykatës së Tiranës, e cila rrëzonte padinë e Vangjel Prelës, konstatohet se ai ka vendosur si adresë kontakti adresën e kompanisë “Progeen”.
Pra, megjithëse padia e Vangjel Prelës ishte për çështje personale, ai e identifikonte veten me kompaninë, e cila së fundmi ka fituar tenderin me vlerë të lartë të Fondit Shqiptar të Zhvillimit.
Tenderi
Në Tetor 2020, Fondi Shqiptar i Zhvillimit shpalli tenderin “Ndërtimi i godinës së parkimit dhe hapësirave mbështetëse në Gjirokastër”, me fond limit 419 milionë lekë të reja.
Referuar dokumentave zyrtare, rezulton se Fondi Shqiptar i Zhvillimit parashikon ndërtimin e një parkimi nëntokësor, në sheshin përballë Shtëpisë së Pionerëve të qytetit.
Gjurma e ndërtimit përfshin një sipërfaqe prej rreth 3 mijë metra katrorë dhe projekti është parashikuar të përfundojë për 12 muaj.
Fondi Shqiptar i Zhvillimit hapi ofertat e paraqitura për këtë tender disa ditë më parë dhe vendosi skualifikimin e 14 prej 18 operatorëve në garë, për shkak të mosplotësimit të kritereve, siç deklarohet zyrtarisht.
Në përfundim, u kualifikuan vetëm 4 operatorë konkurentë, nga të cilët u shpall fitues “Progeen & Sina”, të cilët kishin paraqitur ofertën më të ulët.
