Nga Boldnews.al
Ergys Verdho, drejtori i Autoritetit Rrugor Shqiptar, i ka “falur” plot 1.5 milionë euro firmës “Salillari”, në pronësi të biznesmenti Pëllumb Salillari. Kjo kompani mori pjesë në tenderin me objekt ndërtimi i rrugës që lidh autostradën “Milot – Morinë” me Aereoportin e Kukësit. Pra, pas koncesionit për mirëmbajtjen e kësaj rruge, Salillari merr një tjetër tender, duke ngritur hije të mëdha dyshimi se të gjitha procedurat po bëhen për të favorizuar këtë kompani.
Pak ditë më parë, Verdho i ARRSH-së ka shpallur fituesin e kësaj procedurë. Oferta më e ulët në tender ka qenë me vlerë 420.000.000 lekë. Ndërkohë, “Salillari” ka kërkuar 567.719.180 lekë. Madje, është renditur i pesti në klasifikim. Diferenca mes vlerës më të ulët dhe fituesit është plot 147.719.180 lekë pa TVSH. Dhe, po të shtosh dhe TVSH-në, vlera e tenderit arrin në plot 1.5 milionë euro.
Sipas dokumenteve që ka siguruar “Boldnews”, në tender kanë marrë pjesë plot 7 kompani. Siç e përmendëm pak më lart, “Salillari” u rendit i pesti. Por, nga hulumtimet ka rezultuar se të gjitha firmat që morën pjesë në garë janë s’kualifikuar. E çuditshme, por e vërtetë! Po le të analizojmë dokumentet e tenderit. Përse u s’kualifikuan të gjitha firmat në këtë garë? Me një shikim të shpejtë, rezulton se të gjitha kompanitë pjesmarrëse në tender janë oligarkë dhe kompani që marrin thuajse të gjithë tenderat që zhvillohen në Shqipëeri. Madje, edhe me mbështetje të forta politike, si “Fusha”, “Alko Impex”, “Vëllezërit Hysa”, etj. Por të gjitha këto kompani janë skualifikuar, përfshi edhe “4A-M” & “BE-IS” & C.E.C Group”. Sipas dokumenteve të tenderit, ky bashkim operatorësh u s’kualifikua për kriterin që nuk ka përvojë të suksesshme në realizimin e punimeve të ngjashme.
Sipas dokumenteve, Bashkia Kukës ka propozuar që varianti që i shkon më së miri dhe zhvillimit të planeve vendore të hartuara është pikërisht lidhja e areoportit me nyjen lidhëse të autostradës nëpërmjet një rruge të re me gjatësi rreth 3 km. Ky segment fillon me ndërtimin një rrethrrotullimi në terminalin kryesor të areoportit. Një rrethrrotullim i projektuar në nivel do të përnmbledhë katër akse rrugore. Aksin që hyn në porten kryesore të areoportit, aksin që del direkt, aks i dedikuar për areoport dhe që lidhet me autostraden Milot Morinë, aksin Kukës Peshkopi dhe aksin tjetër areoport Kukës. Lidhja këtij segmenti me autostraden do të bëhet me kryqëzim në disnivel.
Pra, për vetëm një kryqëzim në disnivel, u s’kualifikuan të gjitha firmat në garë, pavarësisht se shumica kanë bërë rrugë, kanë fituar dhjetëra tendera publikë, madje edhe koncesione. Por, për Ergys Verdhon, ky kriter ka qenë i prerë. Dhe, fituesi dihej.
