Policia e shtetit ka reaguar pas publikimit në mediat online se një 20-vjeçar i arrestuarit në protestat e ditëve të fundit është në gjendje të rëndë shëndetësore në komisariatin e policisë Nr.1. Bëhet fjalë për Andrea Bregu, në foton lart, për të cilin u tha se po i refuzohet ndihma mjekësore.
Pas këtyre lajmeve ka reaguar policia e Tiranës që thotë se ai është arrestuar në protestën e 11 dhjetorit dhe më pas rendit një sërë veprash penale për të cilat akuzohet: “Organizimi dhe pjesëmarrja ne grumbullime e manifestime të paligjshme”, “Kundërshtimi i punonjësit të policisë së rendit publik”, “Pengimi i qarkullimit të mjeteve të transportit”, “Prishja e qetësisë publike”, “Shkatërrimi i pronës me zjarr” dhe ”Mosbindja ndaj urdhrit të punonjësit të policisë së rendit publik” dhe ‘’Mbajtja dhe përdorimi i lëndëve plasëse dhe piroteknike”.
Policia thotë se ai ndodhet në gjendje të mirë shëndetësore, e konfirmuar nga mjeku i Drejtorisë Vendore të Policisë Tiranë si dhe në prezencë të dy përfaqësuesve të Avokatit të Popullit. Në fund policia e shtetit jep edhe “leksione gazetarie” se nuk duhen publikuar lajme të pakonfirmuara.
