Pasi selia e tyre në Shkodër, u dëmtua në protestën e ditës së djeshme, socialistët nuk kanë qendruar duarkryq, dhe përgjatë gjithë natës kanë bërë të mundur rikonstruktimin e saj, duke e kthyer madje dhe më mirë se në gjendjen fillestare.
Këtë lajm e ka bërë me dije dhe vetë i dërguari politik socialist në qytetin verior, Ilir Beqaj, i cili thotë se veprimi i protestuesve ka shkaktuar zemërim dhe mërzi tek simpatizantët e PS, por tashmë çdo gjë është rregulluar.
”Të trishtuar janë ndjerë shumë shkodrane e shkodranë, të cilëve u kërkoj ndjesë. Përpos shqetësimeve shëndetësore në familje e të afërm të krijuara nga sëmundja e Covid 19, përpos vështirësive ekonomike të krijuara nga ngërçi i ekonomisë prej pandemisë, ndjesia e zjarrvënies në mes të qytetit e rëndon psikozën individuale dhe kolektive.
Të mërzitur janë ndjerë shumë socialiste e socialistë shkodranë. Edhe simpatizantë e mbështetës të PS-së. Midis tyre ka edhe shumë të indinjuar. Kam komunikuar gjatë gjithë ditës me disa prej tyre. E mirëkuptoj zemërimin e tyre. Por besoj se tani në darkë, jemi të vetdijshëm se durimi dhe përulësia me të cilën e përballëm gjatë paradites sulmin ndaj selisë ka ndikuar drejtpërdrejt në lartësimin e qytetarisë shkodrane.
Me fotot nga përfundimi i eleminimit të dëmtimeve të paradites së sotme të selisë së PS-së, ju uroj të gjithëve në Shkodër, natën e mirë, gjumë të qetë dhe të dielë të këndshme nesër, meqë edhe moti do të jetë pa shi”, shkruan Beqaj.
Siç mund të shihet dhe nga pamjet, dikush ka marrë furçën e ka lyer muret, e ndonjë tjetër leckën për të larë pllakat, për të kthyer selinë në gjendjen fillestare.
