Ka ndërruar jetë Dervish Kalaja pasi u godit me sende të forta disa ditë më parë në Ishëm të Durrësit. Ngjarja ndodhi rreth orës 22:00 të së dielës.
Pas ngjarjes, njoftoi arrestimin e tre personave: A.K., 36 vjeç, Xh.K., 21 vjeç, banues në Ishëm dhe R.(G).A., 34 vjeç, banues në Sukth.
“Këta shtetas, në bashkëpunim me njëri-tjetrin, rreth orës 22:00 të mbrëmjes së djeshme, në ambientet e lokalit në pronësi të shtetasit Sh.I., dyshohet se kanë goditur me mjete të forta shtetasit Dervish Kalaja, 55 vjeç dhe S.A., 62 vjeç, ndërsa shtetasi R.(G). A. ka goditur me mjet prerës (thikë), shtetasin E.K., 33 vjeç, i cili ndodhet në spital, nën kujdesin e mjekëve, jashtë rrezikut për jetën. Në vijim të veprimeve u arrestua në flagrancë edhe shtetasi Sh. I., 31 vjeç, banues në Ishëm (pronari i lokalit ku ka ndodhur ngjarja), për veprën penale ‘Moskallëzim krimi’, pasi nuk ka njoftuar Policinë për konfliktin e ndodhur në ambientet e lokalit të tij. Gjithashtu, nga shërbimet e Policisë i është vendosur masë administrative 1.000.000 lekë, pasi nuk ka respektuar orarin e vendosur për mbylljen e aktivitetit”, njoftoi policia.
Kalaja u dërgua në spitalin Ushtarak në Tiranë, por nuk arriti të mbijetojë duke ndërruar jetë mbrëmjen e djeshme.
