Barcelona do ta mësojë rivalin e saj në 1/16-ve finale të Champions-it të hënën e ardhshme. Humbja 3-0 ndaj Juventusit e kualifikoi ekipin katalanas si i dyti në grup, gjë që praktikisht garanton përballje më të vështirë në raundin tjetër. E thënë ndryshe, do të shortohet me një ekip të nivelit të parë në raundin e parë të “nokautit” të këtij kompeticioni.
Sipas prognozës matematikore që bën “Sport”, rerferuar llogarisë në Twitter @BayernForumCom, opsionet për ta matur veten me secilin rival nuk janë saktësisht të njëjtat. Duhet të kihet parasysh se ekipet nga i njëjti grup nuk mund të sfidojnë njëri-tjetrin, as ekipet nga i njëjti vend, faktorë që ndryshojnë llogaritjen e probabiliteteve.
Bayern Munich është skuadra me më shumë opsione për t’u përplasur me Blaugrana-t në turin vijues të Champions-it. Bavarezët dhe katalanasit kanë 22.23% shanse për t’i kryqëzuar rrugët, më shumë se me çdo ekip tjetër.
Në rastin e Barçës, pas Bayernit vjen Dortmundi, me 21.55%. Më pas, PSG kompleton “podiumin” me 14.34%. Chelsea është i katërti me 14.15%, Liverpool i pesti me 14.03% dhe Manchester City i gjashti me 13.67%.
Për Bayernin, katalanasit janë gjithashtu rivali më i mundshëm. Pas skuadrës së Koeman, Sevilla është skuadra që ka më shumë mundësi për të qenë rival i kampionëve të Gjermanisë dhe Europës në fuqi: 21.17%. “Podiumi” plotësohet nga Lazio e Inzaghi. Italianët kanë një shans prej 20,95% për t’u takuar me bavarezët./Telesport
