Reperi i njohur Stresi dhe babai i tij, Sali Lushaj, do i bashkohen protestës së sotme, që do zhvillohet për vrasjen e 25-vjeçarit, Klodian Rasha, nga efektivi i policisë.
Në një video të publikuar në Instagram, Sali Lushaj shprehet se efektivi nuk përfaqon Policinë e Shtetit, por diktaturën.
“Do mblidhemi të protestojmë në mënyrë paqësore për vrasjen e një njeriu të pafajshëm, nga një dorë kriminale, një polici që nuk përfaqëson policinë e Shtetit por diktaturën. Duhet të jetë djali i ndonjë krimineli që ka vendosur dorë mbi një 25-vjeçar por haram qoftë rroba që ka mbajtur vesh një kriminel,”- u shpreh ai.
Ndërkohë Stresi u bëri thirrje ndjekësve të tij, që t’i bashkohen protestës paqësore, e cila do jetë një homazh për të riun, Klodian Rasha.
“Ju ftojmë të gjithë në një protestë paqësore, që do jetë homazh për 25-vjeçarin,”- u shpreh reperi.
View this post on Instagram
25-vjeçari Klodian Rasha është qëlluar për vdekje nga një efektiv policie. Krimi policor ndodhi rreth orës 01:45 të së Martës, sipas njoftimit nga autoritetet. Pas një ndjekje, një efektiv, në pamundësi për ta arritur, e qëlloi me armën e shërbimit të riun disa metra larg banesës, duke i shkarkuar vdekjen.
Në njoftimin zyrtar për ngjarjen, policia deklaroi se efektivi që shkrepi armën, kujtoi se 25-vjecari që me gjasë vraponte për ti shpëtuar një gjobe për shkeljen e karantinës, “i drejtoi punonjësit të policisë një send të fortë në dukje armë zjarri”.
Megjithatë, viktima nuk rezultoi të kishte armë zjarri me vete. Autoritetet njoftuan se u gjet një pistoletë në rrugicat ku ndodhi ndjekja e të riut nga efektivi i policisë, por kurrsesi se viktimës iu gjet armë zjarri me vete. Nuk është provuar se i riu ishte i armatosur dhe aq më tepër që kërcënoi efektivin që qëlloi ndaj tij.
Efektivi që shtiu mbi Klodian Rashën është arrestuar për veprën penale “Vrasje e kryer në kapërcim të kufijve të mbrojtjes së nevojshme”. “Nga hetimet paraprake është konkluduar se dyshohet se veprimet e punonjësit të Policisë N.H., bien në kundërshim me procedurat standarde të përdorimit të armëve të zjarrit. Ai nuk ka qenë në kushtet e përcaktuara në ligjin për përdorimin e armës së zjarrit, duke kapërcyer kufijtë e mbrojtjes së nevojshme”, njoftoi SHÇBA.
