Partizani arriti të marrë një barazim me shumë vuajtje ndaj Teutës, me durrsakët që humbën një penallti me Vilën në minutat e fundit të ndeshjes.
Pas ndeshjes për Supersport foli trajneri i të kuqve, Ilir Daja.
“Ne jemi me këmbë në tokë. Nuk kemi nxjerrë asnjëherë pretendime dhe kemi luajtur mirë dhe pritshmëria është shfaqur jashtë grupit. Kemi vetëm 12-13 lojtarë që mund t’i fusim në fushë pa prishur gjë. Nuk bëjmë dot rotacion dhe ndërrimet i kemi të vonuara.
Ngjeshja e ndeshjeve është arsyeja pse edhe në fund nuk ishim mirë. Teuta është fituesja e Kupës dhe skuadër të ruajtur dhe të përmirësuar me eksperiencë si Karabeci, Krasniqi, Bregu, Daja etj. Nëse ata kanë mundësi të bëjnë rotacione, ne nuk e kemi dhe mund të jepte efektet e veta. Ishte lojë e barabartë, por në fund fatmirësisht shkuam drejt barazimit.
Do punojmë në administrimin e topit sepse e dorëzojmë shpesh. Sot e kemi qarkulluar dhe kemi tentuar të rrezikojmë me ndërtimin nga poshtë. E thashë se ishte ndeshje hapur dhe kishte raste nga të dy portat. Inferioriteti numerik ndodhi nga gabimet në pasime.
Njëherë gaboi mesfushori ynë sepse kur ndërton nga poshtë do hapesh edhe në gjerësi nga mbrojtësit. Të dy ekipet kanë liruar hapësira, por problemet më të mëdha i kanë pasur në shkallëzime. Në situatën që jetojmë nuk mund të bësh projekte afatgjata.
Do mundohemi të kemi sa më pak humbje në lojë dhe pikë deri në dhjetor me shpresën që do hapet merkatoja, megjithëse merkatoja e janarit nuk ofron shumë mundësi. Të marrim lojtarë mesatarë për të bërë rotacion në pozicione natyrale. Tre barazime? Një ekip ka qenë kampion, njëra ka dalë e treta, tjetra ka fituar Kupën.
