Grupi hetimor ka sekuestruar kamerat e një servisi që dyshohet se kanë filmuar ngjarjen e ndodhur orët e para të mëngjesit në kryeqytet, ku një efektiv policie qëlloi një të ri pranë banesës.
Burime pranë grupit hetimor bënë me dije se, i riu është qëlluar me dy plumba, një në kokë dhe një në shpinë. Sipas dëshmive, shtuan të njëjtat burime, deri në orën 22:00, Klodian Rasha ka qenë duke pirë kafe në një lokal pranie banesës.
Pistoleta në vendngjarje
Një pistoletë është gjetur në zonën ku ndodhi ngjarja.
“Në vijim të veprimeve hetimore të kryera nga Grupi i Posaçëm Hetimor i përbërë nga SHÇBA dhe Policia nën drejtimin e Prokurorit gjatë kqyrjes së vendit të ngjarjes dhe zonës përreth u bë e mundur gjetja e armës së zjarrit që dyshohet se i përkiste shtetasit Klodian Rasha, i cili nuk iu bind urdhërit të Punonjësit të Policisë për të ndaluar. U sekuestrua në cilësinë e provës materiale armë e zjarrit pistoletë me një krehër me fishekë”, njoftoi policia.
Ngjarja
Më herët, burime zyrtare nga blutë e Tiranës bënë me dije se, rreth orës 01:45, shërbimet, gjatë patrullimit në rrugën “Dritan Hoxha”, kanë konstatuar një shtetas i cili kryente veprime të dyshimta.
“Punonjësit e Policisë i kanë bërë thirrje të ndalonte, por personi nuk i është bindur urdhërit të Policisë për të ndaluar. Edhe pas thirrjeve të vazhdueshme të bëra nga ana e Punonjësit të Policisë për të ndaluar përsëri nuk ka ndaluar dhe është larguar me vrap duke i drejtuar punonjësit të policisë një send të fortë në dukje armë zjarri. I gjendur në këto kushte dhe në mungesë të ndriçimit të plotë punonjësi i policisë ka qëlluar me armë zjarri dhe për pasojë ka mbetur i plagosur shtetasi K.R., 25 vjeç i cili ka humbur jeten në spital”, thuhet në njoftimin e bluve të kryeqytetit, për ngjarjen.
Të njëjtat burime shtuan se është ngritur grupi i Posaçëm Hetimor i përbërë nga SHÇBA dhe Policia, ndërsa “vijon puna intensive nga grupi hetimor për zbardhjen e dinamikës së ngjarjes”.
Policia njoftoi se, prokurori ndodhet në vendngjarje dhe po ndjek e monitoron të gjitha veprimet që po kryhen nga Shërbimi për Çështjet e Brendshme dhe Ankesat në Ministrinë e Brendshme dhe nga Policia për zbardhjen e rrethanave të ngjarjes, ndërsa punonjësi i policisë shtetasi N.H., është shoqëruar në ambientet e Drejtorisë Vendore të Policisë Tiranë, për veprime të metejshme.
