Autoritetet në kryeqytet kanë vënë në pranga efektivin e policisë, i cili vrau me armë zjarri gjatë orëve të natës 25-vjeçarin Klodjan Rasha.
Arrestimi i efektivit të skuadrës Shqiponja u bë nga Shërbimi për Çështjet e Brendshme dhe Ankesat në Ministrinë e Brendshme, që bashkë me prokurorinë kanë nisur hetimet për të zbardhur rrethanat e plota të ngjarjes. Mësohet se efektivi i policisë me iniciale N.H akuzohet për vrasje në kushtet e kapërcimit të mbrojtjes së nevojshme. Pritet që për rastin të ketë edhe një njoftim zyrtar.
Sipas policisë, 25-vjeçari Klodjan Rasha u qëllua pak pas mesnate, pasi nuk iu bind urdhrit të policisë për të ndaluar. Ngjarja ndodhi rreth orës 01:45 në një nga rrugicat në afërsi të Laprakës në Tiranë, teksa i riu po lëvizte në këmbë.
