Kjo e hënë, shënon dhe nisjen e aplikimit të testeve të shpejta për të identifikuar personat që janë të prekur me Covid 19.
Përgjigjja e tamponit përmes testeve të shpejta del për 30 minuta.
Por ku do të zhvillohen këto teste dhe si do të orientohen qytetarët për realizimin e tyre?
Testet e shpejta ndodhen dhe do të përdoren nga epidemiologët e Instituti të Higjienës në kryeqytet dhe pas datës 20 dhjetor do të shpërndahen në të gjithë vendin.
Do të jenë epidemiologët që do të vendosin sipas hetimeve epidemiologjike se ku do të kryhen testimet.
Mjekët kanë deklaruar se përsa i përket procedurave se si do të zhvillohen këto teste, do të jenë fillimisht ato vatra ku ka më shumë se 2 infektuar p.sh në zyra, shkolla, institucione etj.
Sa i përket numrit të testeve, janë rreth 100 mijë teste që kanë mbërritur. Paralelisht do të funksionojnë dhe tamponët.
‘Vatrat mund të jenë një shkollë, një fasoneri, qendër shëndetësore ku ka më shumë se 2 të infektuar. Që nga sot vazhdon paralelisht dhe testimi me PCR, kurse nga data 20 dhjetor bëhet lidhja me mjekun e familjes për aplikimin e kiteve të shpejta. PCR do të funksionojë në ato raste kur mjeku e gjykon që rezultati i kiteve nuk është ai që duket nga shenjat klinike’, deklaron Arapi.
