Suedezët refuzojnë të kryejnë vaksinën antiCovid-19. Kjo për zyrtarët e shëndetësisë është tepër shqetësuese dhe një sfidë e re.
Suedia shmangu izolimin, mbylljen e ekonomisë dhe përdorimin e maskave, duke vepruar në kah të kundërt me shtetet e tjera europiane.
Megjithëse imuniteti i popullatës përmes ekspozimit nuk ishte kurrë një strategji e deklaruar, autoritetet suedeze kishin shpresuar se mjaft njerëz do të krijonin antitrupa për t’u mbrojtur nga shpërthimet e reja.
Suedia pret të marrë mjaft vaksina Covid-19 për të imunizuar rreth një të pestën e popullsisë në tremujorin e parë. Vetëm 46% e suedezëve kanë deklaruar se duan të vaksinohen, ndërsa 26% shprehen kundër.
Epidemiologu i njohur suedez, Anders Tegnell thotë se shpreson që më shumë suedezë të pranojnë vaksinën me kalimin e kohës. Një forcë kryesore në favor të Suedisë, thotë ai, është sistemi i saj kombëtar i kujdesit shëndetësor, që ka infrastrukturën e nevojshme për të shpërndarë vaksinën në një segment sa më të gjerë të popullsisë.
Shumë suedezë ende kujtojnë përpjekjet e vendit një dekadë më parë për të luftuar virusin H1N1. Pas shpërthimit të gripit të derrit në 2009, Suedia pa një kërcim të papritur në rastet e narkolepsisë, i cili më vonë u zbulua të ishte një efekt anësor i programit të saj të vaksinimit masiv. Çrregullimi i gjumit ishte veçanërisht i përhapur në mesin e fëmijëve dhe adoleshentëve.
Efektet anësore ishin “jashtëzakonisht për të ardhur keq”, tha Tegnell, i cili ishte një nga personat e ngarkuar me planin e vaksinimit në atë kohë.
Megjithëse pjesëmarrja në programet vullnetare të imunizimit të fëmijëve në Suedi mbetet pothuajse universale, episodi i gripit të derrit duket se ka dëmtuar besimin në vaksinat e reja. /Bloomberg
