Partia Demokratike ka paditur në SPAK ministren e Mbrojtjes, Olta Xhaçka. Sipas PD, ministrja ka shpërdoruar detyrën duke përdorur helikopterin e Forcave të Armatosura për të shkuar në Dibër, për fushatë elektorale.
Në një deklaratë për gazetarët jashtë Prokurorisë së Posaçme, ish-deputeti i PD, Gent Strazimiri tha se ministrja akuzohet për shpërdorim detyre dhe përdorim të funksionit publik për fushatë elektorale.
Po ashtu, në padi akuzohen dhe drejtues të FA-së, që sipas PD, kanë lejuar ministren të përdorë mjetet e ushtrisë për fushatë elektorale, në kundërshtim me ligjin.
Albana Vokshi u shpreh se Xhaçka “e ka përdorur si taksi personale helikopterin e FB në mënyrë të përsëritur prej një viti”.
“PD ka shfaqur provat dhe datat që ka udhëtuar Xhaçka, 22 udhëtime në 2 mujat e fundit, që kanë lidhje me fushatën elektorale të PS. Një udhëtim kushton nga 5 në 10 mijë euro, janë 100 mijë euro të abuzuara”, shtoi ish-deputetja e PD.
