Elisa Spiropali, një nga bletët punëtore të Rilindjes, ka refuzuar sot propozimet e bëra nga disa deputetë, për rritjen e ndihmës ekonomike për të pamundurit, ndërkohë që vendi po përballet me pandeminë e Covid-19.
Elisa ka zgjedhur të përdorë shprehjen “nuk u bë deti kos”, për ato qindra e qindra familje që tërmeti u ka shembur banesat dhe sot jetojnë në çadra, apo të tjerë që pandemia iu hoqi mundësinë e një pune.
Në fakt ministrja e Shtetit për Marrëdhëniet me Parlamentin, mund të ketë të drejtë që “deti nuk është bërë as kos as qumësht” për ata që janë në çadra, që nuk kanë mundësi jetese apo s´mund të përballojnë as recetat e ilaçeve.
Deti është bërë kos, qumësht e dhallë, në fakt për PPP apo koncensionet, të cilat sipas buxhetit të 2021, do të përfitojnë një fond edhe më të madh se ai që shkon për shëndetësinë.
Thjesht Rilindja luan me shifra, bën propogandë dhe tund letrat se këtë vit buxheti për shëndetësinë është rritur me 23 %, por nuk thuhet sa para nga ato që janë marrë në formë borxhi janë shpërndarë, pikërisht për arsyen sepse u morën borxh.
Gjithsesi Elisa edhe sot goditi pikërisht ata që sot vuajnë në çadra nga tërmeti, që u mashtruan për 1 vit se do t´i ndërtohen shtëpitë, ato të tjerë që pandemia i ka varfëruar edhe më shumë. Nesër ata mund të jenë një uragan votash që mund të nxjerrin Elisën në pension politik, ose ndoshta lihen në varfëri ekstreme për t´u blerë me më pak se 1 thes miell.
