Nga BoldNews.al
Draft-Kodi i ri Penal, i cili ka kaluar për shqyrtim nga Ministria e Drejtësisë në komisionet parlamentare, ka një seri çudirash dhe absurditetesh.
Një ndër to është edhe neni 238, me titull “Cënimi i imazhit të personit”.
Sipas projektit të ministres së Drejtësisë, Etilda Gjonaj, dënohet deri në një vit burg kushdo që publikon “në cdo formë, mënyrë apo mjet i një montazhi të realizuar me fjalët ose imazhin e një personi pa pëlqimin e tij, nëse kryhet për qëllime përfitimi material ose jo material, apo kur ka qëllim të dëmtojë reputacionin e një personi, kur materiali nuk shfaqet dukshëm që është një montazh ose nëse nuk përmendet shprehimisht se eshtë i tillë, përbën kundrvajtje penale dhe dënohet me burgim deri në 1 vit”.
Zbërthimi i këtij neni, pavarësisht se i ngarkuar me shumë fjalë, është fare i thjeshtë-qeveria parashikon të dënojë me burg këdo që “merr guximin” të bëj Meme në rrjete sociale.
Meme-t janë foto ose video montazhe, kryesisht të personazheve publikë dhe politikanë, të cilat synojnë të krijojnë ilaritet dhe humor në radhët e publikut të gjerë.
Por, për qeverinë e Edi Ramës, publikimi i Meme-ve, pa i marrë leje kryeministrit, ministrave apo kujdto tjetër, është një vepër e rëndë penale, aq sa publikuesi i tyre duhet të vuajë deri në një vit burgim.
Sipas të njëjtit draft-nen, hetimi penal fillon me ankesën e “të dëmtuarit” ose avokatit të tij.
Në Shqipëri, si në çdo vend të botës ku interneti është i lirë, ka shumë persona me aftësi të mira krijuese, të cilët krijojnë dhe publikojnë “Meme” mbi çështje me rëndësi, të cilat përbëjnë interes publik.
Madje, administratorët e rrjeteve sociale dhe portaleve informative, e kanë kuptuar rëndësinë e “Meme-ve” dhe i japin një hapësirë të gjerë në faqet e tyre, njëlloj siç veprojnë agjencitë mediatike on-line në të gjithë vendet e botës.
Fushata presidenciale në Shtetet e Bashkuara të Amerikës, e mbylluar para pak javësh, u shoqërua me një numër jashtëzakonisht të lartë Meme-sh për kandidatët rivalë Donald Trump dhe Joe Biden.
Natyrisht, në asnjë prej publikimit të “Meme-ve” amerikane, nuk thuhej askund se kishte nevojë për leje për punë të tilla krijuese dhe askund nuk shënohej se ato ishin “montazh”.
Një publik, edhe nën nivelin mesatar, e ka të qartë se kur një foto është Meme dhe kur është reale.
Por, për Etilda Gjonaj dhe shefin e saj, Edi Ramën, artistët e Meme-ve duhet të përfundojnë në burg, në rast se krijojnë montazhe pa lejen e tyre.
