Ditën e sotme shqiptarët festojnë 28 Nëntorin si festën e tyre kombëtare. 28 Nëntori ndryshe njihet edhe si Dita e flamurit. Kjo ditë është e veçantë për shqiptarët në mbarë botën (jo vetëm në Shqipëri) sepse në këtë datë të vitit 1912 u shpall Pavarësia e Shqipërisë nga Ismail Qemaili në Vlorë.
Megjithatë, ashtu si edhe ditë të tjera të shënuara, edhe sot nuk pritet të shohim aktivitetet që na kanë shoqëruar vitet e shkuara për shkak të pandemisë që ka prekur vendin dhe mbarë botën.
Autoritetet shëndetësore kanë apeluar prej ditësh qytetarët që të shmangin grumbullimet për të mos përhapur infektimin covid-19.
Politika uron 28-nëntorin
Presidenti Ilir Meta ka uruar këtë ditë festive duke kujtuar se 108 vite janë mjaftueshëm për të dëshmuar pjekurinë dhe seriozitetin e një shteti modern, për përmbushjen pa vonesë të aspiratës popullore dhe misionit të nisur në 28 nëntor 1912, nga Ismail Bej Vlora, për ta bërë Shqipërinë si gjithë Europa.
“Gëzuar Ditën e Flamurit Kombëtar, Ditën e Pavarësisë së Shqipërisë!
Të punojmë dhe angazhohemi çdo ditë për ta mbrojtur simbolin tonë të shenjtë dhe përbashkues, të valvitet krenar në këto troje, i pastër dhe i paprekur, njësoj si gjaku i derdhur për të, nga bijat e bijtë më të mirë të kombit.
108 vite janë mjaftueshëm për të dëshmuar pjekurinë dhe seriozitetin e një shteti modern, për përmbushjen pa vonesë të aspiratës popullore dhe misionit të nisur në 28 nëntor 1912, nga Ismail Bej Vlora dhe gjithë etërit e Pavarësisë, për ta bërë Shqipërinë si gjithë Europa.
Urime për 28 Nëntorin e Gjergj Kastrioti Skënderbeut, Ismail Qemalit dhe Isa Boletinit!
Zoti e bekoftë Flamurin Kombëtar dhe shqiptarët kudo ndodhen!”, shkruan Meta.
Ndërkohë, kryeministri Edi Rama ka zgjedhur të urojë këtë ditë me një shprehje të Ismail Qemalit.
