Tërmeti/ Kurti: Dhimbja na bashkon, të gatshëm për të ndihmuar Shqipërinë

Kreu i Lëvizjes Vetëvendosje, nëpërmjet një postimi në rrjete sociale, kujton tërmetin tragjik të 26 nëntorit, të vitit të shkuar që goditi Shqipërinë duke theksuar se ‘Vetëvendosje’ është e gatshme për të ndihmuar sërish Shqipërinë.

Kurti shprehet se dhimbja na bëri bashkë, duke theksuar se Ushtria e Kosovës, u nis menjëherë në ndihmë të dëmtuarve ngatërmeti.

Kurti thotë se u hapën shtëpitë në Kosovë e u ngritën kampe që prisnin të pastrehët, për ta lehtësaur sado pak dhimbjen.

Kreu i Vetëvendosje, shtoi se sot jemi sërish bashkë në përkujtim të viktimave dhe të gjithë pasojave nga tërmeti tragjik i nëntorit të vitit të shkuar.

Statusi i plotë:

E kujtojmë sot tërmetin e 26 nëntorit 2019, që preku qindra mijëra njerëz në Shqipëri. Tronditjen e tokës e ndjemë në gjithë qytetet e Kosovës. Por më e fortë ishte tronditja prej dhimbjes së familjeve që humbën më të dashurit e tyre, me të cilët ndau pikëllimin e gjithë Kosova dhe kombi shqiptar. Dhimbja na bëri bashkë.

Qytetarët e Kosovës, ashtu si gjithë shqiptarët kudo që janë, u erdhën në ndihmë motrave e vëllezërve të dëmtuar nga tërmeti,me gjithë çka patën mundësi. Ushtria e Kosovës u nis menjëherë në mbështetje të operacioneve të kërkim shpëtimit.

LEXO EDHE  Vrasje dhe aksidente/ E diela e përgjakur që lamë pas

Edhe deputeti ynë, Liburn Aliu, i cili ka përvojë në misione të tilla, u gjend në Thumanë, duke ndihmuar edhe personalisht për nxjerrjen e njerëzve nga rrënojat, e historia që më ka treguar ka lënë mbresa të pashlyeshme.

Aktivistët e Lëvizjes me ndihmën e shumë qytetarëve mblodhën mbi 300 ton ndihma, që i dorëzuan në Rezervat e Shtetit, në Shqipëri. U hapën shtëpitë në Kosovë e u ngritën kampe që prisnin të pastrehët, për ta lehtësuar sado pak dhimbjen e vuajtjen.

Edhe sot e kësaj dite në Kosovë ka ende familje nga Shqipëria, mbetur pa strehë atje e të strehuara këtu. Sot jemi sërish bashkë në përkujtimin e viktimave dhe gjithë pasojave të tërmetit.

E dimë që ende mijëra njerëz vazhdojnë të jetojnë në çadra, ashtu siç e dimë se Shqipërisë nuk i kanë ardhur fondet e premtuara nga ndërkombëtarët në konferencën e donatorëve për rindërtimin.

Në emër të Lëvizjes VETËVENDOSJE! dëshiroj t’i shpreh institucioneve në Republikën e Shqipërisë gatishmërinë tonë maksimale për të ndihmuar në këtë kohë kaq të vështirë. Sfidat i përballojmë më mirë, vështirësitë i kalojmë më lehtë kur jemi të bashkuar.