Ministrja e Shëndetësisë dhe Mbrojtjes Sociale, Ogerta Manastirliu, publikoi sot një video orientuese që qytetarët e prekur nga COVID-19 që trajtohen në banesë mund të përfitojnë barnat me rimbursim falas.
Mjeku i familjes përshkruan recetën sipas protokollit, në varësi të gjendjes së pacientit. Me kodin e recetës një i afërm i pacientit paraqitet në farmacitë me kontratë me FSDKSH për të marrë barnat falas.
Së fundmi, qeveria vendosi rimbursimin e paketës së barnave për trajtimin ambulator në banesë për personat e diagnostikuar me COVID-19 nga Fondi i Sigurimit të Detyrueshëm të Kujdesit Shëndetësor.
Sipas vendimit të qeverisë, paketa e barnave për trajtimin ambulator në banesë të pacientëve të diagnostikuar me COVID-19 përbëhet nga dy skema trajtimi, në përputhje me formën e sëmundjes, sipas udhëzuesit të miratuar nga Komiteti Teknik i Ekspertëve.
Vlera e rimbursimit të paketës së barnave për skemën 1 të trajtimit (forma e lehtë) do të jetë jo më shumë se 1650 (një mijë e gjashtëqind e pesëdhjetë) lekë.
Vlera e rimbursimit të paketës së barnave për skemën 2 të trajtimit (forma e mesme) do të jetë jo më shumë se 10900 (dhjetë mijë e nëntëqind) lekë.
