Real Madrid ka triumfuar 0-2 përballë Interit në “San Siro”. Me këtë rezultat do të duhet një mrekulli që skuadra italiane të kalojë fazën e grupeve në Champions League.
Tashmë me 2 pikë të grumbulluara në 4 ndeshje, shanset e djemve të Contes për të kaluar më tej janë minimale duke parë dhe fitoren që Munchengladbah arriti ndaj Shakhtar, për të rrëmbyer vendin e parë.
Interi hyri më superior në fushën e lojës, por kjo gjë nuk zgjati pasi arbitri akordoi një penallti për “Galaktikët” në minutën e 7, e cila u shndërrua në gol nga Hazard, i rikthyer si titullar.
Vendasit po përpiqeshin me të gjitha forcat për të arritur golin e barazimit, por pa rezultat dhe pikërisht në momentin më të mirë të tyre Vidal ndëshkohet me dy kartonë të verdhë brenda pak minutash për ta lënë ekipin me 10 lojtarë që nga minuta e 33.
Tanimë kthimi i ndeshjes është një mision i pamundur. Tentativat e vështira të zikaltërve thyen shpejt dhe hapësirat në mbrojtje janë të mëdha. Në minutën e 59 vjen dhe goli i dytë i Realit falë dhe një devijimi të topit nga Hakimi.
Në minutat në vijim djemtë e Zidane u përpoqën që të administronin rezultatin dhe ia arritën këtij qëllimi më së miri.
Nga ana tjetër, kampionët në fuqi, Bayern Munich nuk fal asgjë, pavarësisht se kryeson i shkëputur nga ekipet e tjera.
Ekipi gjerman fitoi me rezultatin 3-1 ndaj Salzburgut, ndërsa ngec sërish Atletico Madridi. Ekipi spanjoll barazoi me rezultatin 0-0 ndaj rusëve të Lokomotivës së Moskës në shtëpi.
Kampionët në fuqi të Europës gjetën golin e parë me anë të Lewandowskit në minutën e 42′. Sulmuesi polak gjeti rrjetën me lehtësi pas një kthimi të topit nga portieri kundërshtar.
Pjesa e dytë dhuroi dhe golat e tjerë, pasi ishte Coman që gjeti golin me një gjuajtje të devijuar, ndërsa Sane çoi shifrat në 3-0 me kokë. Goli i nderit i Salzburgut u shënua nga sulmuesi me origjinë shqiptare Mërgim Berisha për 3-1.
