Tirana do të luaj nesër me Bylisin në 13:45. Sfida e “Selman Stërmasit” vlen për javën e katër të Kategorisë Superiore. Në lidhje me këtë duel, para medieve ka dalë kapiteni I bardhebluve, Idriz Batha.
Mesfushori I ka vënë “fajin” kohës së pakët me trajnerin e ri për humbjen e fundit me Vllazninë në Shkodër. Gjirokastriti vendos theksin te ndeshjet e radhës, të cilat I quan si dy finale, që vijnë para derbit me Partizanin.
Humbja në Shkodër? Çdo ditë që kalon, me trajnerin e ri që kërkon të fusë idetë e tij në ekip është në favorin tonë. Mendoj dhe shpresoj që të mos përsërisim të njëjtat gabime që bëmë ndeshjen e fundit. Sa më shumë t’i afrohemi idesë së trajnerit aq më mirë do të jetë për të gjithë.
Mendoj që kishim pak ditë në dispozicion për t’u përshtatur me stilin e ri të lojës. Nuk bëmë një lojë brilante, por që kishim mundësitë tona për ta fituar ndeshjen.
Strategjia për Bylis? Bylis është një skuadër që ka treguar se është kockë e fortë për të gjithë ekipet. Është skuadër agresive, mendoj që do t’i marrim masat dhe shpresoj të bëhet lojë e bukur.
Derbi pas tre javësh? Të jem i sinqertë nuk e mendoj derbin. Kemi 2 ndeshje finale para se të shkojmë te derbi. Në situatën që jemi, me pikët që kemi grumbulluar nuk na lejohet ta kemi mendjen te derbi.
