Këngëtari i njohur britanik ka bërë gjestin e rrallë. Ed Sheeran ka dhuruar 10 mijë paund për spitalin që kujdesej për gjyshen e tij të ndjerë. 29-vjeçari dhuroi shumën e caktuar për spitalin Aldeburgh me qëllim që të blihen instrumente muzikore për pacientët me nevoja të veçanta, si një mënyrë për të kaluar sadopak stresin, shkruajnë mediat e huaja.
Donacioni u krye nga Fondacioni Framlingham Trust, që u krijua për t’ju ardhur në ndihmë shkollave në vendin e tij të origjinës, Suffolk.
Kujtojmë se kjo nuk është hera e parë që ai bën donacione të tilla pasi disa kohë më parë, Ed Sheeran dhuroi një shumë prej 200 mijë paundësh, për shkollën ku ai studioi dhe njohu gruan e tij, Cherry Seaborn.
Këngëtari ka ndihmuar për të blerë pajisje për departamentin e muzikës, artit, shkencës si dhe kompjutera të rinj. Krijuesi i hitit “Perfect” është siguruar të kontribuojë para dhe për mjedisin, duke shpenzuar qindra mijëra paund për të ndërtuar pyllin e tij të shtrirë në Suffolk me vlerë 3.7 milion £.
