Gjykatën e Fierit ka lënën nën masën e sigurisë “arrest me burg” Fatmir Hoxhajn, 52-vjeçarin e akuzuar për vrasjen e Ahmet Toskës. Ky i fundit u ekzekutua me armë zjarri më 26 tetor, në lagjen “Sheq i Madh”.
Para gjykatës, autori i dyshuar ka mbajtur qëndrim mohues lidhur me akuzat. Mësohet se ai ka deklaruar se është i pafajshëm dhe nuk ka lidhje me vrasjen e 50-vjeçarit Ahmet Toska.
Fatmir Hoxhaj ka pretenduar se nuk ka prova që të provojnë implikimin e tij në krim, ndërsa ka ngritur alibinë se kur ka ndodhur ngjarja ka qenë në gjumë.
“Atë dite jam ngritur nga gjumi në orën 8”, mësohet të jetë shprehur Hoxhaj. Ndërkohë, sipas policisë, ngjarja ka ndodhur rreth orës 6 të mëngjesit.
Pavarësisht deklaratave të autorit të dyshuar, gjykata vendosi të pranojë kërkesën e akuzës, që kërkoi lënien në qeli të Fatmir Hoxhajt. Ky i fundit akuzohet për veprat penale “Vrasje me paramendim” dhe “Mbajtje pa leje të armëve dhe municionit luftarak”.
Pala mbrojtëse, ndërkohë, ka kërkuar në gjykatë një masë më të butë se ajo që kërkoi akuza. Avokatja mbrojtëse e të akuzuarit, e vendosur kryesisht, tha në një prononcim për gazetarët pas seancës se “nuk kishte prova që të formulohej dyshimi i arsyeshëm”.
Ajo u shpreh se “provat e paraqitura nga prokuroria ishin kamerat e sigurisë së lagjes, që ishin marrë në pika të ndryshme, disa mbetje nitrati nga ekzaminimi në rrobat e të pandehurit, por vetëm me disa grimca nitrati, pa u qartësuar më tepër këto, për mendimin tonë nuk përbënin një dyshim të arsyeshëm”.
Për të pandehurin, tha se ai ka deklaruar se kishte shkuar me bashkëshorten në Itali dhe pasi kishte marrë vesh që policia kishte shkuar për kontroll në banesë, është rikthyer në Shqipëri dhe është vetëdorëzuar në polici.
