Rritja e numrit të të infektuarve në Shqipëri si dhe mungesa e kapaciteteve në kryeqytet ka bërë që të përgatiten spitalet rajonale për t’i kthyer ne spitale Covid.
Spitali i Korçës bëhet spitali i tretë rajonal pas Vlorës dhe Durrësit që një pavijon i veçantë do të funksionojë për të prekurit me Covid.
Këtë e konfirmon për Euroneës Albania edhe drejtori i spitalit rajonal të Korçës, Litjan Broka.
“Korça ka një pavijon të cilin do e verë në dispozicion të covid-it, që është pavijoni i sanatoriumit, i cili ka kapacitet prej 54 shtretërish, ku do investohet, do rregullohet, do mundësohet që parametrat të jenë sa me optimale për trajtimin e kësaj sëmundje”, tha ai.
Drejtori i Spitalit të Korçës thekson se për përballimin e situatës ka në gatishmëri personelin mjekësor.
“Për kushtet e tanishme dhe këto kapacitete janë, ekziston stafi mjekësor që mund të bëjë trajtimin e diagnostikimin por kjo varet gjithmonë, situata është dinamike dhe të gjithë shpresojmë që këto kapacitete të jenë të nevojshme dhe jepet maksimumi për personat që do trajtohen”, shtoi ai.
Po ashtu alarmante janë dhe shifrat e qarkut, 900 persona janë aktiv me Covid-19, 100 prej tyre mësues duke shkaktuar kështu problematike edhe ne institucionet arsimore”.
