Pak ditë më parë, një qytetar i Kosovës, u bë pjesë e një skenari, që duket është dirigjuar nga Edi Rama, lidhur me akuzat ndaj Lulzim Bashës, për rolin që ka pasur si përkthyes dhe ndihmës ligjor i UNMIK, gjatë hetimeve për masakrat në luftën e Kosovës.
Milaim Bellanica, i cili ka xhiruar masakrën në Krushën e Madhe, në një intervistë për Top Channel, pretendoi se kasetën ia ka dhënë Lulzim Bashës. Deklarimet e Bellanicës u pasuan nga disa pyetje dhe akuza në drejtim të Bashës se kishte lidhje me akuzat e ngritura ndaj ish-drejtuesve të UÇK mbi atë që njihet tashmë si shtëpia e verdhë, dhe që sipas Dick Marty, ka shërbyer për transplantin e organeve dhe trafikimin e tyre.
Lulzim Basha i ka quajtur akuzat si shpifje dhe ka pohuar në Top Story se se ka takuar kurrë Bellanicën dhe se nuk ka marrë kurrë një kasetë prej tij.
Belanica nuk e fsheh që e ka çuar kasetën në BBC, madje pohon se Lulzim Basha erdhi t’ia kërkonte këtë dokument të rrallë, vetëm pasi pamjet u shfaqën në BBC.
Nga një foto që qarkullon, shfaqet Dashamir Peza, miku i Edi Ramës dhe ish-deputet i PS, i cili në vitin 1999 ka shoqëruar si përkthyes një gazetar të BBC. Peza shfaqet i pari majtas, në videon e mëposhtme.
Hektor Pustina, korrespondent i AP, shprehet për Lapsi.al se “ai ra i pari në kontakt me Bellanicën dhe më kujtohet që e mori kasetën në një furrë buke”.
Nga arkivi i tij Pustina ka nxjerrë dhe dy filmime të shkurtra të një televizioni norvegjez ku duket Milaim Bellanica, Dashamir Peza dhe gazetari i BBC duke marrë filmimet nga kaseta.
Genocidi në Krushën e Madhe nga forcat militare serbe ndodhi në 1999, ku u masakruan e u vranë më shumë se 240 persona ku nuk u kursyen dhe gra e fëmijë e u dogjën mbi 800 shtëpi.
Një vit më parë, i njëjti person, Milaim Bellanica, ka rrëfyer në një dokumentar ngjarjet e asaj dite dhe zbulon se xhirimi 45-minutësh është filmuar nga vetë ai.
Ai ka deklaruar se fillimisht xhirimin e tij 45 minutësh ku u flimuan 64 kufoma është parë nga BBC, dhe më pas kopja origjinale i është dorëzuar Lulëzim Bashës.
Bellanica akuzon Bashën dhe Dashamir Pezën si fajtorët e vetëm të zhdukjes së këtyre filmimeve.
“Lulëzim Basha dhe Dashamir Peza kanë keqpërdorur të dhënat që i ka dhënë BBC për mua që kanë qenë të detyruar të japin shpjegime, i kanë marrë për veti, kane marrë kontratat dhe nënshkrimet dhe kane përfituar në krah temin”, është shprehur ai rreth 1 vit më parë.
Basha ka mohuar të ketë pasur kontakte me Bellanicën, madje publikisht tha se nuk e ka takuar asnjëherë. Në shpjegimin publik, Basha tha se kaseta është publikuar dhe mund të gjendet edhe sot, ndërsa tha se nuk kishte asnjë arsye pse ta zhdukte atë.
Tashmë i takon Dashamir Pezës, të japë versionin e tij lidhur me kasetën, për të cilën prej ditësh është vënë nën akuzë kreu demokrat.
