Nga BoldNews.al
Pandemia e shkaktuar nga Covid-19 duket se ka “ç’akorduar” Gjendjen Civile.
Shqipëria, për tre-mujorin e dytë të vitit 2020, e cila përkon me situatën e mbylljes së vendit për shkak të virusit, nuk ka të dhëna të sakta për numrin e lindjeve dhe vdekjeve.
Kjo situatë, e cila është e ngjashme me fillimet e hershme të shtetit shqiptar, bëhet e ditur nga Raporti periodik i Institutit të Statistikave (INSTAT).
Sipas INSTAT, “numri i lindjeve dhe vdekjeve gjatë tremujorit të dytë 2020 mund të mos reflektojë realitetin”.
Në raportin zyrtar lexohet gjithashtu se “për shkak të situatës së covid-19, mos raportimet nëpër zyrat e gjendjeve civile në të gjithë Shqipërinë për numrin e lindjeve dhe vdekjeve mund të mos jenë reflektuar në regjistrat përkatës”.
Për këtë arsye, deklaron zyra qendrore e statistikave, të dhënat për tre-mujorin e dytë të vitit 2020 do të jenë objekt rishikimi dhe do të vlerësohen.
Përtej anës teknike të punës së INSTAT, raportimi i saj tregon për një situatë amullie në sistemin administrativ të gjendjes civile në të gjithë territorin.
Prej mesit të muajit Mars e deri në fund të Majit 2020, Shqipëria u përfshi në një izolim thuajse të plotë, për shkak të pandemisë Covid-19.
Megjithatë, shërbimet e nevojshme, përfshirë Gjendjen Civile, vijuan aktivitetin e tyre me staf dhe për shërbime të reduktuara.
Përgjatë periudhës së pandemisë, zyrat e Gjendjes Civile në të gjithë Shqipërinë kanë kryer shërbimin e regjistrimit të lindjeve dhe vdekjeve.
Pra, duket e paqartë se përse INSTAT nuk ka të dhëna të sakta mbi lindshmërinë dhe vdekshmërinë në vend gjatë periudhës së izolimit masiv.
Megjithatë, referuar të dhënave të siguruara në mënyrë të pjesshme, siç deklaron INSTAT, rezulton se në tre-mujorin e dytë të vitit 2020 është shënuar ulje si e lindjeve, ashtu edhe e vdekjeve, krahasuar me të njëjtën periudhë të vitit 2019.
Kështu, numri i lindjeve në tre-mujorin e dytë 2020 është rreth 8 përqind më i ulët se sa ai i periudhës Prill-Qershor 2019.
Po ashtu, numri i vdekjeve në tre-mujorin e dytë të vitit 2020 është 3.1 përqind më i ulët, krahasuar me Prill-Qershor 2019.
