Një 15-vjeçar është plagosur rëndë në Kukës me mjete të forta, nga një 28-vjeçar, vëllai i një bashkëmoshatareje të personit të plagosur. Akti i dhunshëm ka ardhur pasi vajza ka treguar se ishte abuzuar seksualisht nga 15-vjeçari.
Burime zyrtare nga policia njoftuan se 28-vjeçari G.M., pasi ka mësuar nga e motra se shtetasi I.Ç. kishte kryer marrëdhënie seksuale me dhunë me të, e ka goditur me shufër hekuri duke e plagosur rëndë në kokë I.Ç. Ky i fundit ndodhet në spitalin rajonal të Kukësit, në gjendje të rëndë shëndetësore.
Ndërkohë 28-vjeçari është arrestuar për veprën penale “Plagosja e rëndë në gjendje të tronditjes së fortë psikike”.
Nën arrest është vënë dhe adoleshenti i plagosur. “Arrestimi i tij u bë pasi ka bërë kallëzim një shtetëse 15-vjeçare, se shtetasi I.Ç., banues në fshatin Mgullë, ka kryer marrëdhënie seksuale me dhunë me të”, njoftoi policia.
Adoleshenti akuzohet se për veprën penale “Marrëdhënie seksuale ose homoseksuale me dhunë me të mitur”.
Dosja lidhur me ngjarjen i ka kaluar prokurorisë së rrethit.
