Tashmë është zyrtare, Nevil Dede është trajneri i ri i Tiranës. 45-vjeçari zëvendëson Emmanuel Egbo-n i cili u shkarkua dje pas rezultateve të dobëta të skuadrës.
Një rikthim ky për Deden në krye të bardhebluve. Për herë të parë, Nevil Dede është ulur në krye të pankinës bardheblu, në tetor të vitit 2010, ku qëndroi për katër muaj.
Më pas, në shkurt të vitit 2013, ai u rikthye te Tirana, duke qëndruar deri në tetor të atij viti në drejtimin e kampionëve të Shqipërisë.
Njoftimi i KF Tirana:
Nevil Dede është trajneri i ri i KF Tirana.
Klubi i Futbollit Tirana emëron në krye të pankinës bardheblu ish kapitenin legjendar Nevil Dede. I shpallur 8 herë kampion i Superligës Shqiptare, 5 herë fitues i Kupës së Republikës dhe 6 herë fitues i Superkupës, Dede ka shkruar një pjesë të historisë së bardhebluve. Nevil Dede ka qenë edhe më parë në krye të Tiranës në rolin e trajnerit dhe është njohës i mirë i kampit. Ai do të marrë nën drejtim skuadrën në seancën stërvitore të rradhës. #miresevjenNevilDede
