Presidenti Ilir Meta deklaroi këtë të Premte se situata me menaxhimin e pandemisë në vend po del jashtë kontrollit.
Kreu i shtetit, në një konferencë për gazetarët, tha se “telefonatat që marrin tregojnë një vështirësi serioze të sistemit shëndetësor, kryesisht atij publik në përballimin e situatës”. “Sot isha në një ngushëllim, nesër do të jem sërish”, u shpreh kreu i shtetit.
Meta bëri disa rekomandime për autoritetet.
“Jam shumë i shqetësuar për numrin e të të prekurve dhe numrin e personave që kanë humbur jetën. Duhen marrë masa të menjëhershme për të frenuar përhapjen masive të COVID. Është e domosdoshme që qytetarët të testohen që të mbrojnë veten dhe familjarët. Të trajtohen me protokolle mjekësore të qarta që shëndeti i tyre të mos jetë objekt improvizimesh që kërcënon jetën e tyre dhe kthehet në biznes për të tjerët. Duhet miratuar sa më parë nga qeveria rimbursimi i barnave për të sëmurët që trajtohen në banesat e tyre”, tha Meta, i cili po ashtu hodhi akuza për manipulim të dhënash.
Ai deklaroi po ashtu se opozita ka qenë “5 hapa para në raport me qeverinë” në sjelljen e tyre në raport me pandeminë.
Presidenti foli dhe për ligjin për Metrologjinë, që e ktheu për rishqyrtim në Kuvend. Meta tha se është anti-kushtetues dhe është bërë nga qeveria me qëllim dhënien e koncesioneve në dëm të qytetarëve. Sipas ligjit, shtoi Meta, “një apo dy oligarkë kërkojnë të vjedhin konsumatorët shqiptarë”.
I pyetur për deklaratat e Presidentit serb Vuçiç, i cili kërcënoi Kosovën me një konflikt ë armatosur, Meta tha se të gjithë duhet të mësojnë të bashkëjetojnë me Kosovën, si shtet të pavarur. “Edhe në Shqipëri, për ata që nuk e kanë të qartë”, shtoi.
