Ish-kampionia e notit, Deborah Keçi, ka rezultuar pozitive me koronavirus, ndërsa është vetëkarantinuar në shtëpi.
Në një lidhje me Skype për emisionin “Ftesë në 5”, ajo tha se ka patur simptoma të lehta, dhimbje trupi, koke dhe ndjesinë e lodhjes, ndërsa thotë me nota humori: “Jam aq kompetitive sa s’mund të ikte pa e kapur”.
Keçi bën apel për ruajtjen e qetësisë, duke shtuar se paniku dobëson imunitetin dhe e bën më të vështirë luftimin e virusit për trupin.
“Jam aq kompetitive sa s’mund të ikte pa e kapur. Kam patur temperaturë, ke një lloj këputje të përgjithshme dhe dhimbje trupi, mua më ka kapur te pjesa e kurrizit dhe fundit të shpinës. Kam pak dhimbje koke, por besoj që duhet të merret me qetësi dhe duke ndjekur këshillat e mjekut. Duhet të jesh në qetësi. Kam dalë në ballkon për ajër të pastër, kam pasur lodhje dhe dhimbje koke dhe nuk kam patur shumë energji”, tha ajo.
