Ish-drejtori i Bankës “Credit Agricole” në Gjirokastrës, Artan Nisllaj, është vënë në pranga, pasi ndaj tij rëndon një dënim me me 18 muaj burg dhënë nga Apeli i Gjirokastrës.
Policia e Tiranës njoftoi këtë të Enjte se efektivët e Drejtorisë së Policisë së kryeqytetit bënë “kapjen dhe ndalimin e shtetasit Artan Nisllaj, 41 vjeç, banues në Tiranë, pasi Gjykata e Apelit Gjirokastër e ka dënuar me 18 muaj burg, për veprën penale ‘Vjedhja duke shpërdoruar detyrën’”.
Referuar hetimeve, ish-kreu në Gjirokastër i “Credit Agricole”– bankë që në vitin 2015 e ndërroi emrin në Banka Amerikane e Investimeve (ABI BANK) – ka vjedhur paratë e bankës që drejtonte.
Vendimi
Në vendimin e Apelit të Gjirokastrës, sqarohet në më 23 dhjetor 2011, nga Drejtuesit e Bankes Emporiki (Credit Agricole Group), është marrë vendimi i brendshëm për të kryer një transferim fizik të një shume parash nga Dega e Gjirokastrës në atë të Sarandës për nevoja të kësaj të fundit.
Ne 26 dhjetor 2011, drejtori i degës Gjirokastër duke patur parasysh se agjencia e bankës në Kakavije do të mbyllej ne date 30.12.2011, udhëzoi që një pjesë e shumes 10 000 euro të tërhiqeshin nga Agjencia e Kakavijës.
Ne momentin qe mjeti i transportit të Shoqërisë së Ruajtjes se Sigurisë Fizike, mbërriti në Kakavije për të kryer transportin e parave, arkëtari dhe punonjësi i vetëm i Agjencisë se bankës në Kakavije, V.Gjoni ka deklaruar se nuk ka para gjendje në Agjencinë e Kakavijës.
Është kryer menjëherë kontrolli i gjendjes së Agjencisë nga ku rezultoi se, mungonte një shumë prej 15 000 Euro dhe 7 000 dollarë.
Pas këtij konstatimi, shtetasi V.Gjoni lëshoi një deklaratë me shkrim me të cilën, pranonte me vullnet të lirë se i mungojnë nga kasaforta e agjencisë 50 kartëmonedha 100 euro dhe 200 kartëmonedha 50 Euro, në total 15 000 Euro dhe 70 kartëmonedha njëqindëshe dollarë, në total 7 000 dollarë. Gjithashtu V.Gjoni ka pretenduar se shumën prej 15 mijë euro dhe 8 000 dollarë i janë dhënë shtetasit Artan Nisllaj i cili ka qene drejtor i Degës Gjirokastër për bankën.
Mbi bazën e materialit kallëzues të ardhur nga banka, Prokuroria e Rrethit Gjirokastër ka filluar procedimin për veprën penale të “Vjedhjes duke shpërdoruar detyrën“ dhe ka marrë të pandehur Nisllajn.
Ai është dënuar nga gjykata e rrethit me gjobë. Çështja u apelua nga prokuroria dhe në shkallë të dytë, në shkurt 2015, ish-drejtori i bankës është shpallur fajtor për veprën penale të “Vjedhjes duke shpërdoruar detyrën” dhe është dënuar me një vit e gjashtë muaj burgim.
