Mjeku infeksionist Pëllumb Pipero, ka folur mbrëmjen e sotme lidhur me infektimin e Kryepiskopit Anastas Janullatos dhe Arqipeshkvit George Frendo nga koronavirusi.
Pipero i bëri thirrje komuniteteve fetare të reduktojnë sa më shumë ceremoni apo grumbullime fetare. Ai theksoi në Repolitix se koronavirusi nuk bën përjashtime, ndaj kërkoi edhe të merren masa.
“Unë do i bëja thirrje komuniteteve fetare që të reduktojnë sa më shumë ceremoni apo grumbullime fetare.
Në këto institucione fetare është e vështirë që të ruhet distanca në ambiente të mbyllura. Do të ishte shumë e rëndësishme që për një kohë ato të pezullohen.
Ky virus nuk bën përjashtim dhe asnjë nuk është i mbrojtur.
Po shohim raste që e kanë kaluar dy herë. Ne këmbëngulim që të respektohen të gjitha masat parandaluese, pavarësisht besimeve fetare“, deklaroi mjeku.
