Kryeministri Edi Rama deklaroi këtë të Mërkurë se testet për Covid që rezultojnë negative e kryhen në spitale private nuk raportohen në bilancin ditor.
Rama, në një konferencë për gazetarët, deklaroi se kjo është një politikë e ndjekur nga Komiteti Teknik ndaj Covid, ndërsa shtoi se komiteti ka vendosur që ta raportojë këtë tregues në një moment të dytë. Arsyen pse veprohet në këtë mënyrë, nuk e shpjegoi.
Çfarë do të thotë kjo?
Nëse një ditë më parë u raportuan nga Ministria e Shëndetësisë 563 raste të reja në 24 orët e fundit nga 2 723 testime – rastet e reja kanë dalë nga testimet e kryera nga ISHP dhe laboratorët private (sipas Ramës). Ndërkohë, numri i testimeve 2 723 është vetëm ai i kryer nga ISHP.
Në realitet, sipas Ramës, numri i testimeve në total – të kryer nga ISHP de spitalet private, është më i lartë, pasi në raportimin ditor të MSH nuk përfshihen mostrat që rezultojnë negative në laboratorët privatë.
