Gazetari Besart Kadia është emëruar sot zyrtarisht zv. ministër i Financave. Pas vendimit, ka pasur reagime të shumta, për faktin se Kadia ka qenë një prej Sekretarëve të PD dhe anëtar i Këshillit Kombëtar të kësaj partie.
Por nga PD ka qarkulluar një dokument i 5 nëntorit 2019, pothuajse 1 vit më parë, ku Lulzim Basha, ka firmosur vendimin për shkarkimin e Kadias si anëtar i Këshillit Kombëtar, edhe pse nuk dihet ende se kush e ka zëvendësuar atë.
Nuk dihet se çfarë e ka shtyrë Kryeministrin Edi Rama të emërojë Kadian si numrin dy të Ministrisë së Financave, por Monika Kryemadhi, gjatë një debati televiziv e ka cilvsuar atë si njeriun e Zamir Manes, që paguhet prej tij dhe që po përdoret nga Edi Rama. Video e mëposhtme tregon një nga debatet mes Kryemadhit dhe Kadias.
Në anën tjetër vetë Rama ka ironizuar dhe tallur gazetarin Kadia, që sot zyrtarisht mori pozicionin e zv.ministrit në qeverinë e tij. Në emisionin “Zonë e Lirë”, Rama tha se nuk e njihte fare, ndërsa në një tjetër studio e pati quajtur ‘ekspert që flet broçkulla’.
Kadia në anën tjetër, kur ishte pjesë e strukturave të PD apo kur paralajmëronte krijimin e një partie të djathtë, deklaronte se Qeveria Rama është drejt fundit.
Referuar të gjitha debateve, duket se emërimi i Kadias si zv.ministër ose është një kompromis, ose një tërheqje vëmendjeje.
Ish-zëvendësministrja e Financave e qeverisë Rama, Irena Beqiraj e ka ironizuar me një postim në rrjet këtë emërim.
“Tani e ka radhën Papa të lexojë vargje nga Kurani të krishterëve, në meshën e çdo të diele, në San Pietro! Të djathtet do të na marrin më qafë Perandorinë, doja të thoja Partinë.
Jo, mirë e kisha, Perandorinë. Sepse partitë kanë nevojë për ideologji edhe njerëz me bindje të qarta. Perandoritë kane nevojë për jeniçerë, të cilet për interesa personale hidhen sa andej-këndej.
Kur mendoj se politikat socialiste të financave gradualisht kaluan nga Angjeli dhe Ben Malaj tek Kadia më kujtohet një gjoja ekspert i verërave që i thoshte kamarierit: “më sill edhe një 7 up për ta shuar pak këtë verën Cabernet Sauvignon Conti d’Arco se duhet holluar pak”.
PD na e dha me 70% ulje… ne ke do i japim PD-së t’i kthejmë nderin?”, shkruan ajo.
