Pak ditë më parë u njoftua se Sekretari i Përgjithshëm i Kryeministrisë, si dhe stafi i Kryeministrit Edi Rama, ishin infektuar me Covid-19.
Lajmi u bë publik nga ish-deputeti Bardh Spahia. Ndërkohë që janë zbardhur të tjera detaje lidhur me infektimin e zyrtarëve në godinën qendrore të qeverisë.
Raportohet se disa nga personat që përbëjnë edhe stafin e ngushtë të Kryeministrit ishin pjesësmarrës në dasmën e një tjetër zyrtari, Sekretarit të Përgjithshëm në Ministrinë e Financave. Dyshimet janë se ata janë infektuar pikërisht në këtë ceremoni, edhe pse zyrtarisht nuk është e provuar.
Edhe pse dasmat nuk lejohen dhe policia njofton vazhdimisht për vendosje gjobash apo bllokime lokalesh për shkak të ceremonive martesore, duket se zyrtarët e Qeverisë, nuk kanv pyetur shumë për rregullat që thuhet se propozohen nga Komiteti i Ekspertëve, por që më pas kthehen në vendime nga Edi Rama.
Sipas raportimeve mediatike, përveç Sekretarit të Përgjithshëm, Ëngjëll Agaci, të infektuar janë edhe disa drejtorë të tjerë, si dhe prindërit e vajzës, e cila mban shënim dhe dokumenton takimet e kryeministrit Edi Rama.
