“Tamponët për të identifikuar prekjen nga koronavirusi po bëhen me ‘mik’”. Denoncimi i fortë bëhet nga një gazetar dhe nëse fakti qëndron, përbën një skandal për sistemin shëndetësor në vend. Nga njëra anë, dëshmi në media kanë treguar se ISHP po vonon me ditë të tëra përgjigjen e testeve për Covid, apo nuk po teston persona të dyshuar me Covid, ndërsa nga ana tjetër, kemi ekspertë të Komitetit Teknik që hyjnë “mik”, në mënyrë që të njohurve të tyre tu bëhet tamponi.
Është gazetari Driçim Caka, i cili përmes një postimi në rrjetet sociale, tregon disa biseda të Areti Berukës, të bëra ditën e diel.
Gazetari shpjegon se e hasi rastësisht kryeinspektoren e Shëndetit Publik në Tiranë, njëkohësisht anëtare e Komitetit Teknik të Ekspertëve mbi situatën e COVID-19, në një kafene në Tiranë.
Në postimin në FB, gazetari shkruan më tej:
“Nuk e njoha, por më tërhoqi vëmendjen fraza: Merr në telefon dhe thuaji që je mikja e imja dhe të vijnë sot të të bëjnë tamponin.
‘Thuaj e kam patur vartëse doktoreshën dhe të vijnë me urgjencë për të të marrë tamponin, çke ti, merrem unë’, – shprehej tërë siguri Areti Beruka.
Ishin 2-3 telefonata ku Znj.Beruka përmendte fjalën ‘mik’ dhe i sugjeronte t’i shpjegonte operatorit që ishte e njohur me të.
Njoh plot miq këto javë që telefonojnë 127 për të bërë tamponin pasi kanë simptoma, por askush nuk u ka shkuar ende.
Deri dje luteshin mjekë të caktuar që të kishim raste me Covid-19 në Shqipëri, sot i bëjnë tamponin vetëm miqve’.
