Një bandë e përbërë nga shqiptarë dhe afrikanë, që merrej me trafikun e drogës është goditur nga policia në Greqi. Mediat vendase bëjnë me dije se 8 anëtarët e bandës merreshin me trafik droge në Athinë, janë arrestuar.
Sipas hetimit të policisë, ata trafikonin kanabis, heroinë dhe kokainë, kryesisht në zonat e njohura si Iasonos, Kolokynthous dhe Kerameikos.
Drogën ata e fshihnin në pemë, kosha plehrash, vazo lulesh dhe në pjesë të ndryshme në ambiente publike. Pasi droga fshihej aty shkonin e merrnin konsumatorët, duke mos pasur fare kontakt me trafikantët.
Një prej të arrestuarve është dhe pronari i një marketi, i cili kishte rolin e informatorit pasi vëzhgonte të gjitha lëvizjet e policisë në zonë.
Policia në fund të operacionit bën me dije se ka arritur që të sekuestrojë 12,095 euro, 264 gram kanabis, 4 gram heroinë, 15 telefona celularë, si dhe sende të tjera për paketimin e drogës.
