Kryedemokrati Lulzim Basha akuzoi instancat shtetërore për keqmenaxhimin e situatës së Covid në vend dhe fshehje të viktimave nga virusi.
Akuzat u hodhën gjatë një bashkëbisedimi këtë të Hënë me gazetarët që mbulojnë çështjet e shëndetësisë në vend. Këto të fundit treguan lidhur me problematikat në sistemin e shëndetësisë në trajtimin e Covid, si vonesa në kryerjen e tamponëve, vonesa në përgjigjen e tyre. U prekën po ashtu kostot financiare të pacientëve për të trajtuar sëmundjen, kapacitetet në spitale, etj.
Basha tha gjatë bashkëbisedimit se Ministria e Shëndetësisë po fsheh viktimat nga Covid. Ai u shpreh se informacionin e ka nga persona të njohur. “I kam të njohurit e të njohurve të mi. Kanë humbur jetën nga Covid dhe nuk janë raportuar”, deklaroi Basha.
Basha ripërsëriti thirrjen për rritjen e testimeve dhe e vuti theksin te gjurmimi i kontakteve të personave të infektuar. “Kemi humbur mjekë nga COVID sepse janë të pambrojtur”, shtoi ai.
“Nëse do të isha në qeveri do t’i kisha bërë atë që kam thënë që nga marsi. Me paratë e dhëna për inceneratorët do të ishin blerë tamponë, rimbushur ilaçet e COVID”, deklaroi kryedemokrati.
“I kërkoj edhe një herë të marrë masat urgjentisht për të mbrojtur jetën dhe shëndetin e njerëzve. Asnjë shpenzim publik nuk ia vlen përpara jetës dhe shëndetit të qytetarëve. Edhe sot që ndërmarrja e masave do të jepte efekte pozitive në situatën e pandemisë. Nëse nuk ndërmerr asnjë masë për të mbrojtur jetën dhe shëndetin, mbyllja nuk do të kishte asnjë efekt”, shtoi Basha.
