Partizani e nisi me humbje sezonin në transfertë ndaj Kastriotit, ndërsa nesër do të luajë në një tjetër transfertë, këtë herë përballë Kukësit.
Të kuqtë duan tre pikët, i vetmi rezultat që do të sillte qetësi në dhomat e zhveshjes të skuadrës. Ndërkohë në prag të sfidës, trajneri Ilir Daja, ka dalë para mediave dhe ka folur në lidhje më takimin e humbur me krutanët.
“Nga ajo që u pa në ndeshjen e parë, do të thosha që ishte një dozë e shtuar emocionale. Lojtarët, prej pritshmërive të klubit, tifozëve dhe të vetë atyre, kërkonin që të bënin më shumë. Tentuam më shumë, kur barazuam, duke hedhur të gjithë potencialin sulmues për ta fituar ndeshjen.
Kështu që them se nuk është ndonjë vështirësi shumë e madhe, edhe pse ekipet vijnë nga humbje. Kemi nisur me dy muaj me vonesë dhe të gjithë kanë pasur vështirësi, pavarësisht nëse kanë fituar apo humbur. Ende nuk janë stabilizuar në manovër apo në formacionet bazë. Është një ndeshje që duhet ta kishim fituar, por e kemi lënë pas dhe mendojmë për sfidën me Kukësin”, tha Daja fillimisht.
