Anëtarja e Komitetit Teknik të Ekspertëve të shëndetësisë kundër pandemisë së COVID-19, Gjeorgjina Kuli, tha sot se në varësi të situatës epidemiologjike në vend do të shqyrtohen dhe skenarët e mbylljes së pjesshme për shkak të COVID-19.
Në një intervistë televizive Kuli theksoi se “në varësi të luhatjes, edhe të rritjes së pozitivitetit të monstrave sigurisht, që shqyrtohen edhe skenarët e mbylljes të pjesshme të atyre aktiviteteve që cenojnë më pak aktivitetin e përditshëm, qoftë social apo të biznesit, ndoshta të kufizimit të bareve apo restoranteve, por deri tani nuk kemi asgjë konkrete”.
“Akoma nuk ka ardhur virusi i gripit dhe ne përsëri patëm rritjen e rasteve. Momentalisht kemi infeksione respiratore, të ndryshme, shenjat janë njësoj si të shenjave të tjerë respiratore me temperaturë, shenjat e rrufës, kollë. Prandaj dhe vetë ne mjekët klinikisht e kemi të vështirë të bëjmë klinikisht diferencimin e virozave. Prandaj, ne i izolojmë këta fëmijë, ju bëjmë tamponin” – theksoi Kuli.
Sipas saj, ka disa studime madje me një bazë të gjerë pacientësh që fëmijët janë më pak transmetues, fëmijët e moshave të vogla.
“Do të përpiqemi në maksimum, nuk kemi dëshirë që të cënojmë mbylljen e shkollave fillore, ose 9 vjeçare. Me parametrat që kemi deri tani nuk bëhet fjalë për një gjë të tillë” – tha Kuli.
Momentalisht, shtoi ajo, tek pavioni jonë kemi 5 fëmijë të hospitalizuar.
“Kanë një Covid të komplikuar me bronkopneunomoni, me përfshirje të mushkërive ne infeksion. Ne kemi 12 deri në 20 shtretër në dispozicion, janë dhoma që kanë kapacitet të madh, por kemi edhe skenar të ndryshëm, që nëse do të mbushet pavioni i covidit do të hapen edhe pavione dhe shërbime”, u shpreh mjekja.
Gjeorgjina Kuli e vë theksin tek ndërgjegjësimi i sjelljes së qytetarëve për ti bërë ballë valës së dytë të virusit.
