Një mutacion i koronavirusit po terrorizon danezët, por edhe mbarë Europën.Në mënyrë që të parandalohet shpërndarja e mëtejshme e këtij varianti me mutacione të virusit, vendi ka nisur të aplikojë masa të rrepta sigurie në veriperëndim.
Qytetarët e shtatë bashkive janë të urdhëruar që të mos dalin nga rajoni i tyre për të parandaluar përhapjen e infeksionit. Më shumë se 280 mijë njerëz janë prekur nga izolimi.
Qeveria daneze njoftoi të mërkurën se do të theren të gjithë vizonët (një lloj nuselale) në vend. Bëhet fjalë për mbi 17 milionë krijesa që do të eliminohen.
Një formë e mutuar e koronavirusit është gjetur te këto kafshë.
Të premten, Instituti Shtetëror i Serumeve njoftoi se ka gjetur 214 raste të koronavirusit të lidhura me vizonët që nga qershori.
Sipas autoriteteve shëndetësore në Danimarkë, koronavirusi i mutuar mund të ndikojë në efektivitetin e një vaksine për njerëzit.
Nga ana tjetër, simptomat e atyre që janë infektuar nga ky variant i virusit nuk janë më të këqija se ato të pacientëve të tjerë me koronavirus.
