Nga Boldnews.al
Jorida Tabaku, ish-deputete e PD, reagoi sot në emër të partisë më të madhe opozitare mbi Buxhetin e Shtetit të 2021, i cili u diskutua dhe do miratohet nga Kuvendi.
Në një deklaratë të gjatë, ish-deputetja evidentoi disa nga problemet e Buxhetit, për të cilin tha se do të jetë akoma më keq për shëndetësinë, për arsimin, për infrastrukturën publike, për të papunët, për ata me ndihmë ekonomike, për familjet që nuk kanë akoma një shtëpi nga tërmeti, për profesionistët, për biznesin.
“Në një vit qytetarët paguajnë mbi 400 milionë euro në sistemin shëndetësor privat, sepse Edi Rama vetëm e përkeqësoi gjendjen në spitalet publike, duke i çuar paratë tek koncesionet e tij korruptive.
Ky është një buxhet që nuk mbështet rritjen ekonomike, nuk mbështet zhvillimin, por i çon paratë në pak xhepa që kanë lidhur kontot e tyre bankare me fatin e Edi Ramës në pushtet”, theksoi Tabaku.
E ndërsa të gjithë ndoshta presin që partia më e madhe opozitare të flasë me emra konkretë, sërisht nga PD nuk artikulohen emra se cilët janë ata që i kanë të lidhura kontot bankare me fatin e Ramës.
Jo se është vështirë për t’i gjetur, por pyetja që shtrohet është se përse PD nuk i artikulon me emra. Edhe në deklarimet e mëparshme është folur mbi oligarkët, është thënë se numërohen herë me gishtat e njërës dorë dhe herë me gishtat e të dy duarve, por kaq.
Nëse mediat kanë denoncuar rast pas rasti kompanitë apo firmat që kanë përfituar tendera apo para publike nga Edi Rama, pa garë, kjo nuk do të thotë se partia më e madhe e opozitës të ketë kompleksin ti artikulojë, qoftë edhe duke iu referuar denoncimeve publike.
Por jo vetëm media! Mund të marrin si shembull denoncimet publike të Kryetares së LSI-së Monika Kryemadhi.
Zamir Mane, Bashkim Ulaj, Vilma Nushi, Pandi Carapuli, Fusha, Albstar, Salillari, janë disa nga emrat që publikisht janë përmendur nga Kryetarja e LSI-së, Monika Kryemadhi, si lidhje me Edi Ramën. Artikulimet e Kryemadhit ndaj tyre kanë qenë publike dhe pa kompleksin se ndonjëri prej tyre mund të mërzitet.
Dhe ndoshta kaq mund të thotë edhe PD, si partia më e madhe në opozitë, që nesër synon qeverisjen e vendit, apo qoftë edhe ish-deputetja Tabaku, që sot foli në emër të partisë, lidhur me buxhetin.
Deklaratës së saj, Tabaku mund t’i shtonte një apo dy paragrafë më shumë me emrat konkretë, në mënyrë që ai qytetari që rri në shtëpi dhe dëgjon atë që thuhet, të mos mendojë se këta që përfitojnë në kontot e tyre paratë e shqiptarëve, nuk janë as rusë dhe as ndonjë kombësi tjetër.
Të njëjtën gjë që kanë bërë në rastin e inceneratorëve apo check up në shëndetësi, të vetmet denoncime me emra konkretë, PD dhe përfaqësuesit e saj, mund t’a bëjnë edhe për ata që do të përfitojnë nga Buxheti 2021, apo kur flasin për oligarkë të lidhur me Qeverinë apo Kryeministrin.
Duke i vënë një emër, atyre që konsiderohen si përfitues të padrejtë të fondeve publike, thjesht shton besueshmërinë në publik, por edhe jep një sinjal, që nesër në qeverisje nuk do të punosh me të njëjtët emra dhe me të njëjtat skema.
