Që nga fillimi i pandemisë ka patur një rritje të numrit të pacientëve që vuajnë nga i ashtuquajturi”Covid i gjatë”, kur ata “bashkëjetojnë” me simptomat e virusit për muaj me radhë.
Një studim i ri ku studiuesit vëzhguan mushkëritë e pacientëve të vdekur nga COVID-19 mund të hedhë dritë se pse mund të nevojiten disa muaj per rikuperimin e plotë.
Studiues që studiuan mushkëritë e pacientëve të vdekur me koronavirus identifikuan “dëmtime të vazhdueshme dhe të gjera të mushkërive”, raportoi “Reuters”. Më konkretisht, studiuesit kontrolluan mostrat e indeve të organeve nga 41 pacientë që vdiqën nga Covid-19 në spitalin e Triestes në Itali midis shkurtit dhe prillit të këtij viti.
Duke folur për “Reuters”, Mauro Giacca, një profesor në “King’s College London” i cili drejtonte studimin, tha se zemra, mëlçia dhe veshkat në pacientët e vdekur nuk kishin asnjë shenjë të dukshme të infeksionit viral apo inflamacion të zgjatur. Por në mushkëri, studiuesit gjetën shkatërrim vërtet të madh të strukturës së tyre.
“Edhe nëse dikush shërohet nga Covid, dëmi që është bërë mund të jetë shumë i madh”, thekson Giacca.
Për më tepër, ai tha se shumë lloje të qelizave në pacientët e vdekur ishin ende të infektuara me virus.
“Prania e këtyre qelizave të infektuara mund të shkaktojë ndryshime të mëdha strukturore të vëzhguara në mushkëri, të cilat mund të qëndrojnë për disa javë ose muaj dhe përfundimisht mund të shpjegojnë arsyen e simptomave të zgjatura në kohë”, ka përfunduar profesori.
Hulumtimi ndjek një studim të veçantë që pretendonte të identifikonte faktorët e rrezikut që do ta bënin më të mundshëm që një pacient të vuante nga virusi më gjatë, informon dritare.net.
Për shembull, studiuesit zbuluan se në mesin e pacientëve me Covid, simptomat zakonisht renditeshin si lodhje, dhimbje koke, dhe kishin më shumë të ngjarë të shfaqeshin tek pacientët e moshuar, ata me sheqer të lartë në gjakdhe te pacientet femra. “Për më tepër, përjetimi i më shumë se pesë simptomave gjatë javës së parë të diagnozës është gjithashtu i lidhur me Covid të gjatë”, zbuloi studimi.
