Ditën e sotme, është mbyllur gjykata e rrethit gjyqësor Krujë. Shkak është bërë infektimi me koronavirus i njërit prej gjyqtarëve në këtë institucion. Inspektorati i Shëndetësisë ka vendosur mbylljen e gjykatës për një periudhë të pacaktuar kohe.
Burime bëjnë me dije se edhe kancelari i kësaj gjykate rezulton pozitiv me Covid. Ende është e paqartë për qytetarët të cilët kanë procese gjyqësore në këtë organ të drejtësisë, se kur do të rinisë funksionimi i punës së institucionit.
Kujtojmë se ditën e djeshme, si pasojë e Covid-it, u mbyll dhe gjykata e Vlorës.
Situata e pandemisë vijon të jetë tepër problematike në të gjithë territorin e vendit, ku numri i rasteve të reja ka pësuar një rritje të ndjeshme pothuajse të përditshme.
Të martën, Ministria e Shëndetësisë raportoi se në 24 orët e fundit, kanë ndërruar jetë si pasojë e koronavirusit 5 persona, si dhe janë regjistruar 381 raste të reja nga 1684 testime të kryera.
