Kreu demokrat, Lulzim Basha, gjatë një takimi me urdhërin e farcamistit, u shpreh se ka një mungesë të theksuar të ilaçeve për COVID. Basha, ndërsa shprehu mbështetjen dhe mirënjohjen për farmacistët, tha se ndaj tyre hidhen akuza të pabaza, ndërkohë që në tendera sekretë maskat blihen me dyfishin e çmimit.
“Trajtimi i COVID ka një kosto të papërballueshme. Vetëm një paketë e vogël e trajtimit rimbursohet. Ka alarm për mungesën e barnave të rimbursueshme. Farmacitë janë bërë si dyqanet me lista borxhes, njerëzit po marrin barna me lista. Marrja e barnave me listë po shndërrohet në këtë dukuri normale”, tha Basha.
Ai premtoi se në reformën shëndetësore që do të ndërmerret nga Qeveria e PD-së pas zgjedhjeve të 25 prillit do të përfshihen edhe farmacistët, të cilët minimalisht duhet të kenë trajtimin e kolegëve të tyre si në Kosovë dhe Maqedoninë e Veriut.
“Do bëjmë gjithçka për tju mbështetur në këtë kohë të vështirë. Kemi bërë thirrje për blerjen e dozave të vaksinave për gripin stinor. Do të bëjmë gjithçka që në reformën tërësore të sistemit shëndetësor farmacistët shqiptarë do të gjejnë veten”, shtoi Basha.
Diana Toma, Presidente e Urdhrit të Farmacistëve, tha se pesha i bie sistemit shëndetësor dhe nga kjo varen dhe sistemet e tjera. Ndërsa u shpreh se sistemi farmaceutik është një armatë vendimtare në sistemin shëndetësor, Toma theksoi mungesën e mbështetjes dhe mospërfaqësimin në nivelin institucional.
Toma tha se sitemi farmaceutik u përjashtua nga administrimi i pandemisë. “Nga ne kërkohej shumë por problematikat tona nuk u dëgjuan. Sistemi shëndetësor ose funksionon si i tërë, ose me hallka të shkëputura dështon. Ne nuk kemi përfaqësim institucional dhe problematikat tona nuk dëgjohen. Mjekët nuk kanë një protokoll të trajtimit të pacientëve COVID”, shprehet Toma.
