Kapiteni i Partizanit, Alban Hoxha ka folur para mediave, në prag të ndeshjes së parë në kampionat, atë ndaj Kastriotit.
Portieri i të kuqve është shprehur se skuadra dëshiron ta nisë me këmbën e mbarë.
Gjithashtu Hoxha u shpreh se nuk është çudi e madhe që Partizani të tentojë fitimin e titullit.
“Partizani ka ruajtur grupin dhe është ndërthurur, ka lojtarë me eksperiencë, lojtarë që kanë dalë kampionë, por edhe të rinj. Sipas mendimit tim ky është kombinimi i duhur. Shpresoj që nesër ta nisim me këmbën e mbarë, pasi kemi bërë ndeshje të mira në miqësore dhe jemi stërvitur shumë mirë.
Objektivat te Partizani janë maksimale gjithmonë, edhe pse merkato u bllokua. Repartet nuk i kemi shumë të dubluara, sidomos mbrojtja. Objektivi jonë është t’i marrim ndeshjet një nga një. Duke parë ecurinë, do mendojmë ta synojmë titullin kampion. Pse jo, nuk është çudi e madhe…
Trajnerin e njihni mirë, ka mentalitet fituesi. Këtë pjesë ka dashur t’ia transmetojë edhe lojtarëve. Jemi munduar që lojtarët e rinj, të mos kenë presionin e titullit. Të bëjnë mirë për veten e tyre, ne të vjetrit duhet t’i mbajmë afër dhe t’i drejtojmë gjatë ndeshjeve. Shpresojmë që të na shkojë sa më mirë.- tha Hoxha.
