OFL ka njoftuar se i ka dërguar formularin për deklarimin e pasurisë 4 të dënuarve për vjedhje me dhunë, vjedhje me armë, shfrytëzim prostitucioni dhe prodhim dhe shitje të narkotikëve.
Ata janë: Bashkim (Kosta) Mëllugja, Urim Picari, Naim Lataj, Bledar Stafuka. Si subjekt i OFL, ata duhet të përgjigjen me shkrim brenda 48 orëve të gjithë pyetjeve ndërsa do të jetë SPAK që do të vendosë për procedurën e mëtejshme.
“Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
B. (K.) M., banues në Tiranë, i dënuar për veprën penale “Vjedhja me dhunë”, e kryer në bashkëpunim;
U.P., banues në Tiranë, i dënuar për veprën penale “Vjedhja me armë”;
N.L., banues në Tiranë, i dënuar për veprën penale “Prodhimi dhe shitja e narkotikëve”;
B.S., banues në Tiranë, i dënuar për veprën penale “Shfrytëzimi i prostitucionit”.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme”, thuhet në njoftimin zyrtar.
