Ng Boldnews.al
Një qytetar nga Tirana, K.B. është pronar i një mjeti, të cilin e përdor për arsye familjare dhe biznesit të tij të vogël.
Në datë 17 Shtator 2020, ndalohet nga efektivët e Policisë Rrugore të kryeqytetit, pa asnjë shkak të ligjshëm. Ai ka kërkuar sqarime për ndalimin, por nga ana e policit P.T, por nuk ka marrë asnjë të tillë.
Përveçse një gjobe 20 mijë lekë të reja, me argumentin se ka xhamin e përparëm të mjetit të errësuar me qese të zezë. Drejtuesi i mjetit është munduar që të sqarojë se automjeti i tij është i prodhuar me xham të tillë. Në përgjigje ka marrë fletën e gjobën.
Dy ditë më pas, në 19 Shtator 2020, një tjetër efektiv i Policisë Rrugore, I.S. ndalon sërish pa shkak, drejtuesin e mjetit, duke e gjobitur sërish me 20 mijë lekë të reja, me të njëjtin argument, për errësim të xhamit të përparmë të makinës.
Sërish shtetasi K.B është munduar të sqarojë se mjeti i tij është me xham të errësuar original, por sërish është përballur me një faturë gjobe 20 mijë lekëshe.
Pra, brenda dy ditësh, qytetari K.B. penalizohet dy herë Brenda tre ditëve, me një justifikim, i cili nuk qëndron aspak.
Në këtë përfundim konkludoi Gjykata Administrative e Tiranës, e cila pranoi padinë e shtetasit K.B., duke rrëzuar dy gjobat e vendosura nga Policia Rrugore e kryeqytetit, e drejtuar nga Erion Ahmeti.
Në një vendim të datës 14 Tetor 2020, gjykata konstatoi se process-verbalet e shkeljeve, të nënshkruara nga Organi Administrativ Shtetëror (OASH), nuk gjen mbështetje në Kodin Rrugor të Republikës së Shqipërisë.
Gjykata Administrative konstaton se efektivët e Policisë Rrugore i kanë pasur të gjitha mundësitë të verifikonin se xhamat e errët të mjetit të shtetasit K.B. ishin origjinale, sipas prodhimit të fabrikës përkatëse të automobilave.
Siç ka konstatuar gjykata, një fakt i tillë gjendet i shënuar edhe në lejen e drejtimit të mjetit, të cilët paditësi u ka treguar dy efektivëve të Policisë Rrugore në dy rastet e veçanta.
Por, siç ka rezultuar, në asnjërin prej rasteve, efektivët e Rrugores kanë refuzuar të lexojnë shënimet në lejen e qarkullimit, duke gjobitur K.B. dy herë me nga 20 mijë lekë të reja dhe duke e detyruar t’i drejtohet gjykatës për të siguruar drejtësinë.
Në përfundim, Gjykata Administrative e Tiranës ka rrëzuar të dyja gjobat e vendosura ndaj K.B. duke detyruar Policinë Rrugore që të fshijë masat administrative ndaj tij në sistemin e penaliteteve.
